Հոկտեմբերի 18-ի մանկավարժական ակումբին ներկայացնում են Աշոտ Բլեյանը, Սուսան Մարկոսյանը
Մանկավարժական ակումբին սեպտեմբերի 27-ին ներկայացրել ենք տեղեկանք Երևանի «Մխիթար Սեբաստացի» կրթահամալիրի, կրթահամալիրում իրականացվող հեղինակային կրթական ծրագրի մասին։ Հեղինակային կրթական ծրագիրը 35 տարում ամբողջական ներառական է եղել և մնում, բլեյան դպրոցը բոլորինն է, այդ թվում՝ առանձնահատուկ պայմանների կարիք ունեցող և արտակարգ ընդունակություններ դրսևորած երեխաներինը։ Ակումբի՝ հոկտեմբերի 18-ի հավաքին ներկայացնում ենք ծրագրի՝ ուսումնական նախագծերով, ուսումնական օրացույցով կազմակերպման օրինակներ, կրթահամալիրի 35-ամյակի առիթով տոնական նոյեմբերին առաջարկվող բաց, մասնակիցների ընտրությամբ, շրջայցի ծրագրեր, պատրաստ ենք քննարկելու տեղեկանքի, նախագծերի վերաբերյալ հարցերը։
Ակումբի ուշադրությունը հրավիրում ենք նրան, որ չնայած օրենքով որոշված երաշխիքներին, 2009թ.-ից հետո չի ստեղծվել այլընտրանքային ծրագրով աշխատող նոր պետական հաստատություն, գործողներին չի միացել այլ հաստատություն։ Պետական ինստիտուտների և հասարակության ուշադրությունը այլընտրանքի ստեղծման, ընդարձակման մեխանիզմների վրա կենտրոնացած չէ։ Այդպիսին կարող էր լինել, օրինակ, պետության կողմից կառուցվող դպրոցների, կրթահամալիրների ցանկում այլընտրանքային կրթական ծրագիր իրականացնող դպրոցների, նախադպրոցական հաստատությունների, կրթահամալիրների ներառումը։
Իսկ իրավական ակտերում ՀՀ օրենքով որոշված, օրենքով պաշտպանվող այլընտրանքային ծրագրերի անտեսումը խտրության է հանգեցնում կրթական ծրագրերի, նրանց աշխատողների, սովորողների միջև, առաջացնում է լրացուցիչ պարտավորություններ սովորողների, մանկավարժական աշխատողների համար, հակասություններ, այլընտրանքային կրթական ծրագրի զարգացման խոչընդոտներ է հարուցում։ Դրանցից առանձնացնում ենք.
- Հեղինակային կրթական ծրագրի (հիմնական և լրացուցիչ) մանկավարժական աշխատողի (այդ թվում՝ ուսուցչի) ընդունման, ուսուցիչների հերթական ատեստավորման, կամավոր ատեստավորման կարգեր
- Սովորողների գնահատման, դասարանից դասարան փոխադրման, ավարտական քննությունների (այդ թվում՝ հեռավար սովորողների) կազմակերպման կարգեր
- Սովորողների երկարօրյա ուսուցման կազմակերպման
- Կրթության կառավարման տեղեկատվական համակարգում այլընտրանքային ծրագրի գրանցում
- Տեսչական ստուգումների ստուգաթերթեր
- Դասագրքերի շրջանառու հիմնադրամի, պետության կողմից անվճար տրվող դասագրքերի համար հատկացվող միջոցների ծրագրի համար նպատակային օգտագործում
- Հեղինակային կրթական ծրագրի իրականացման (մշակման, կազմակերպման, տարածման) համար 1989թ. նպատակային ստեղծված կրթահամալիր փորձարարական-հետազոտական միավորման կանոնադրության հարգում
Խնդիրների լուծումը միավորող, դրա համար աշխատանքային հատուկ խմբերի ստեղծման արժանի աշխատանք է, և առաջին փորձը կարող է լինել կրթության կառավարման տեղեկատվական համակարգում այլընտրանքային ծրագրի գրանցումը։